Yangiliklar

Bugun xalq bilan muloqot qilish, ularni qiynab kelayotgan turli ijtimoiy muammolarni bartaraf etish barcha darajadagi rahbarlar oldiga muhim vazifalar qo‘ymoqda. Viloyat adliya boshqarmasi boshlig‘i o‘rinbosari Akmal Ergashev ham ushbu talablardan kelib chiqib, Zomin tuman adliya bo‘limi boshlig‘i M.Alimqulov hamda tuman mutasaddilari bilan birga tumanda uyma-uy yurib, aholi murojaatlarini tinglab, yuzma-yuz muloqot qilmoqda.

Xalq bilan muloqot bugun davlatimiz siyosatining eng ustuvor vazifalaridan biriga aylangan. Maqsad bitta xalq dardini tinglash, ularni qiynayotgan masalalarga yechim topish va muammolarini o‘z vaqtida va joyida hal etishdan iborat. Viloyat adliya boshqarmasi boshlig‘i o‘rinbosari Akmal Ergashev Zomin tumanining Taraqqiyot (Qayirma) QFY da uyma-uy yurib, aholi bilan o‘tkazgan muloqotida ham o‘z ifodasini topdi.

Ushbu hududda yashayotgan aholi o‘zlarini qiynayotgan turli ijtimoiy muammolar yuzasidan murojaat qilishdi: bola ikki yoshga to‘lgunga qadar bolani parvarishlash uchun ta’til davrida har oy olinadigan nafaqa, moddiy yordam, banklardan kredit olish, yer uchastkalarini kadastr qilish va boshqa muammolar...

Kun davomida 20 ga yaqin fuqarolar murojaatlari tinglanib, hal etish choralari ko‘rildi. Akmal Mamarasulovich aholiga huquqiy maslahatlar, tushuntirishlar hamda qonunchilikdagi yangiliklarni xayotiy misollar bilan birga tushuntirib berdi. O‘rganishlar davomida hal etilishi katta mablag‘ va vaqt talab etiladigan muammolar bo‘yicha aniq muddat va mas’ullar belgilanib, nazoratga olindi.

Huquqiy targ‘ibot va ma’rifat bo‘limi

Ayni damda Adliya vazirligi ishchi guruhi hamda viloyat adliya boshqarmasi boshligʻi Shokir Saidov Doʻstlik tumanidagi yuridik xizmat koʻrsatish markazida xodimlar uchun yaratilgan sharoitlar, ajratilgan bino, xonalar, kompyuter texnikalari koʻzdan kechirib, oʻz fikr-mulohazalarini bildirmoqda.

https://telegra.ph/YUridik-hizmat-k%D1%9Ersatish-faoliyati-yanada-oshadi-09-28

Xabaringiz bor, 2021-yil 29-iyun kuni “Davlat organlari va tashkilotlariga yuridik xizmat koʻrsatish faoliyatini yanada takomillashtirish chora-tadbirlari toʻgʻrisida”gi Prezident qarori qabul qilingan.
Mazkur Qarorda Respublikaning barcha tuman (shahar)larida yuridik xizmat koʻrsatish markazlarini (Markazlar) tashkil etish belgilangan.
Shunga koʻra, yuridik xizmat koʻrsatish markazlari joriy yilning 1-oktyabridan ish boshlaydi. Hozirda Jizzax viloyatida markazlar faoliyati boʻyicha amaliy ishlar amalga oshirilmoqda.
Shu oʻrinda, markazlarning asosiy vazifasi davlat idoralarining quyi boʻgʻinida qonuniylik va qonun ustuvorligini taʼminlash orqali fuqarolarning huquqlarini himoya qilish hisoblanadi.
Ayni damda Adliya vazirligi ishchi guruhi tomonidan markaz faoliyatini yanada muvofiqlashtirish maqsadida, Jizzax viloyatining eng chekka hududlaridan biri Mirzachoʻl tumanida amaliy yordam koʻrsatilmoqda.

“Shartnomaviy munosabatlarni tubdan takomillashtirish chora-tadbirlari toʻgʻrisida”gi Prezident farmoni (PF–6313-son, 14.09.2021-y.) qabul qilindi. 

Ushbu farmon ayrim shartnomalarni tuzishda oʻrnatilgan suniy cheklovlarni olib tashlash va shartnomaviy munosabatlarda axborot tizimlaridan foydalanish uchun zarur shart-sharoitlar yaratishni koʻzda tutadi. 

Farmonning mazmun-mohiyati yuzasidan Jizzax viloyat teleradiokompaniyasining “Diyor intervyu” koʻrsatuvida viloyat adliya masʼul xodimlari Muhriddin Musurmonov hamda Sherzod Qaynarov oʻz fikr-mulohazalarini bildirdi.

“DIYOR INTERVYU” koʻrsatuvi chorshanba kuni, 22-sentyabr, soat 19.30da efirga uzatildi.

Jizzax Politexnika instituti majlislar zalida Oʻzbekiston Respublikasi Oliy Majlisi huzuridagi nodavlat notijorat tashkilotlarni va fuqarolik jamiyatining boshqa institutlarini qoʻllab-quvvatlash Jamoat fondining granti asosida, Jizzax viloyat “Inson manfaatlari” ijtimoiy-iqtisodiy, huquqiy qoʻllab-quvvatlash markazi tomonidan, “Erkinlik inson huquqi, shaffoflik — uning qadri va manfaatidir” loyihasiga koʻra, “Soʻz erkinligida, axborot olish va tarqatishga oid konstitutsiyaviy normaning ahamiyati” mavzusida ijtimoiy tanlovi gʻoliblari taqdirlandi.
Tanlovda viloyatda huquq sohasini yoritib, ijod qilayotgan jurnalistlar, bosma va elektron ommaviy axborot vositalari xodimlari, blogerlar “Soʻz erkinligida, axborot olish va tarqatishga oid konstitutsiyaviy normaning ahamiyati” mavzusiga doir tanqidiy-tahliliy maqolalari, videorolik, koʻrsatuv, radioeshittirishlari, ijtimoiy hikoyalar kabi targʻibot materiallari bilan qatnashdi.
“Soʻz erkinligida, axborot olish va tarqatishga oid konstitutsiyaviy normaning ahamiyati” mavzusidagi tanlov gʻoliblari quyidagi nominatsiyalarda taqdirlandi:



“Eng faol huquqiy ijtimoiy targʻibotchi” - viloyat teleradiokompaniyasi radio bosh muharriri Sayyora Boʻronova
“Huquqshunos jurnalist”- viloyat adliya boshqarmasi masʼul xodimi Qizlarxon Saidova
“Tezkor va asosli xabarlar qiroli”- viloyat teleradiokompaniyasi yetakchi mutaxassisi Olimjon Qosimov
“Zukko bloger”-Umida Navroʻzova gʻolib boʻldi.

Tadbirda viloyat hokimi oʻrinbosari Latibjon Axmadjonov  tanlov gʻoliblarini qutlar ekan, butun dunyoda yuz berayotgan keskin globallashuv sharoitida, axborot olish vositalari va manbalari tobora rivojlanib, zamonaviy qiyofa kasb etayotgan, “axborot asri” deb yuritilayotgan ayni davrda jurnalist kasbining masʼuliyati ayniqsa, huquq sohasidagi islohotlarni hamda yangi qabul qilingan qonun hujjatlarini targʻib etish, jamiyatda huquqiy madaniyatni yuksaltirishda jurnalistlarning oʻrni, mashaqqati, kerak boʻlsa, javobgarligi ham tobora oshib borayotganini eʼtirof etdi.
“Ozgina qilgan mehnatim, tez kunda shunchalik samarasini berganidan judayam xursandman! Huquq tartibot organlarining eng soʻnggi yangiliklaridan xalqimizni xabardor qilishda davom etaman. Sababi, har kim oʻz haq-huquqini bilsagina jamiyat rivojlanadi, taraqqiyot yuksaladi, insonlar baxtli boʻladi, eʼtibor va eʼtirof uchun tashakkur!”,-deydi viloyat adliya boshqarmasi huquqiy targʻibot va maʼrifat boʻlimi yetakchi maslahatchisi Qizlarxon Saidova.

Koʻtarinki kayfiyatda oʻtgan tadbir barcha ishtirokchilarda unutilmas taassurot qoldirgani shubhasizdir.

Viloyat hokimligi Axborot xizmati

Adliya vazirligi, hududiy adliya organlari va muassasalari xodimlari ham Xalqaro avtomobilsiz kun munosabati bilan ish joylariga piyoda va velosipedda kelishmoqda.



Siz ham bir kun avtomobilingizdan voz kechib, sogʻlom turmush sari qadam bosing!!!

Gʻallaorol tuman adliya boʻlimi tomonidan tuman ichki ishlar va milliy gvardiya xodimlari ishtirokida huquqiy targʻibot tadbiri oʻtkazildi.

Tadbir davomida yangi qabul qilingan bir qator qonun hujjatlari mazmun-mohiyatiga ham toʻxtalib oʻtildi. Xususan, “Oʻzbekiston Respublikasining ayrim qonun hujjatlariga oʻzgartirish va qoʻshimchalar kiritish toʻgʻrisida”gi ( 2021-yil 25-avgust, OʻRQ-711-son) Qonuni mazmun-mohiyati va ahamiyati toʻgʻrisida keng maʼlumotlar berildi.

Tadbirda Oʻzbekiston Respublikasining Saylov kodeksi, “Oʻzbekiston Respublikasi Saylov kodeksiga oʻzgartirish va qoʻshimchalar kiritish toʻgʻrisida”gi (OʻRQ-691-son)Qonuni mazmun-mohiyati xususida atroflicha soʻz bordi.

Gʻallaorol tuman adliya boʻlimi boshligʻi Shukrullo Gʻoziyev “Huquqiy demokratik davlat va kuchli fuqarolik jamiyatining eng muhim belgilaridan biri bu — erkin, ochiq saylov tizimining mavjudligi hisoblanadi. Saylovlar orqali fuqarolar bevosita davlat va jamiyat boshqaruvida ishtirok etadi. Shu bois, saylash va saylanish huquqi fuqaroning eng muhim siyosiy huquqlari sirasiga kiradi”-deb oʻz fikr-mulohazalarini yakunladi. Tadbir soʻnggida ishtirokchilarni qiziqtirgan savollarga batafsil javoblar berildi.



Huquqiy targʻibot va maʼrifat boʻlimi

Tasdiqlangan reja grafikka asosan, shahar hamda tuman hokimlari bilan adliya boshqarmasi boshlig‘ining hamkorlikdagi sayyor qabullari davom etmoqda. Navbatdagi sayyor qabul Jizzax shahar mahalla va oilani qo‘llab-quvvatlash bo‘limi binosida o‘tkazildi.



Shahar hokimi K.Xolmurodov bilan birgalikda o‘tkazilgan sayyor qabulda murojaat etgan fuqarolarning shahar darajasidagi muammoli masalalari o‘rganilib, joyida hal etilishi ta’minlandi.
Sayyor qabul davomida uy-joy uchun ajratiladigan subsidiya tartibi, ta’lim krediti, bankdan kredit olish, “Yoshlar daftari”ga kirish tartibi kabi masalalar bo‘yicha qilingan murojaatlarga tegishli qonunchilik hujjatlari bilan asoslangan holda adliya boshqarmasi boshlig‘i Sh.Saidov tomonidan huquqiy tushuntirishlar berildi.

Sayyor qabulda 40 dan ortiq fuqarolardan kelib tushgan murojaatlar shahar sektorlari bilan birgalikda atroflicha muhokama qilindi. 12 ta fuqaroning murojaati qanoatlantirildi. 28 nafar fuqarolarning murojaatlari tegishli tartibda ko‘rib chiqish uchun nazoratga olindi. Muddat talab qiladigan masalalar bo‘yicha tegishli chora-tadbirlar belgilanib, ijrosi nazoratga olindi.

Huquqiy targ‘ibot va ma’rifat bo‘limi

Uchastka saylov komissiyalari a’zolari bilan o‘tkazilayotgan seminar-treninglarning sifatli o‘tkazilishi viloyat adliya boshqarmasi tomonidan alohida nazoratga olindi.



Rejaga muvofiq, 14-15 sentyabr kunlari ushbu seminar- treninglar 524 ta saylov uchastkalarida tashkil etilib, unda 6452 nafar tinglovchilar ishtirok etishi belgilandi. O‘tkazilayotgan mashg‘ulotlarning tasdiqlangan dars jadvali asosida sifatli o‘tkazilishi ustidan sektorlar kesimida sektor rahbarlari  bilan birgalikda nazorat o‘rnatildi.

Arnasoy tumanidagi 18 ta saylov uchastkasida o‘tkazilayotgan mashg‘ulotlarni samarali o‘tishini kuzatish maqsadida, viloyat adliya boshqarmasi boshlig‘i Shokir Saidov dars jarayonlarida ishtirok etdi.


 Huquqiy targ‘ibot va ma’rifat bo‘limi

2017 — 2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini «Yoshlarni qo‘llab-quvvatlash va aholi salomatligini mustahkamlash yili»da amalga oshirishga oid davlat dasturiga muvofiq, shuningdek, oliy ta’lim muassasalari huzuridagi texnikumlarni o‘z yo‘nalishlari bo‘yicha turdosh oliy ta’lim hamda tarmoq tashkilotlariga biriktirish, o‘rta maxsus va professional ta’lim muassasalarida o‘quv jarayonini yanada takomillashtirish maqsadida:

“Oliy, o‘rta maxsus va professional ta’lim muassasalari o‘rtasida ta’lim jarayoni hamda tarmoq tashkilotlari bilan ishlab chiqarish amaliyoti uzviyligini kuchaytirish chora-tadbirlari to‘g‘risida”gi Prezident Qarori imzolandi. 

Viloyat adliya boshqarmasi tashabbusi bilan ushbu qarorning mazmun-mohiyati yuzasidan davra suhbati tashkil etildi. Suhbatda Jizzax shahar adliya bo‘limi bosh maslahatchisi Jo‘rabek Kulbekov hamda kasbiy ta’limni rivojlantirish va muvofiqlashtirish hududiy boshqarmasi bosh mutaxassisi Abdurauf Mamatqulov ishtirok etdi.

Davra suhbati Jizzax teleradiokompaniyasining “TV sharh” ko‘rsatuvi orqali 19 sentyabr, yakshanba kuni, soat 19.30da efirga uzatiladi.



Huquqiy targ‘ibot va ma’rifat bo‘limi