Янгиликлар
Адлия бўлими нега ҳоким қарорларини бекор қилмоқда.
Мирзачўл тумани адлия бўлимининг 2020 йил I ярим йиллик иш режасига асосан 2020 йилнинг 5-8 июнь кунлари Мирзачўл туман ҳокимлиги ҳамда Халқ депутатлари Мирзачўл туман Кенгаши томонидан қабул қилинган қарорлар реестри мониторинги натижасида Кенгаш ва ҳокимлик томонидан бир қанча қонун ҳужжатлари бузилишига йўл қўйилганлигини аниқланди.
Жумладан, Халқ депутатлари Мирзачўл тумани Кенгашининг 2020 йил 27 апрелдаги “Туман ҳудудидаги аҳоли пунктларининг таркибий қисмларига ном бериш ва уларнинг номларини ўзгартириш тўғрисида”ги 22/6-сон қарори билан ҳудуддаги 12 та кўчаларга ном берилган.
Бироқ, Халқ депутатлари Мирзачўл тумани Кенгаши томонидан юқорида қайд қилинган қарори норматив-ҳуқуқий хусусиятга эга бўлган ҳужжат бўлсада, Мирзачўл туман адлия бўлимига ҳуқуқий экспертизадан ўтказиш учун тақдим қилинмасдан қабул қилинишига йўл қуйилган.
Таъкидлаш лозимки, маҳаллий давлат ҳокимияти органларининг норматив-ҳуқуқий хусусиятга эга бўлган қарорларининг ҳуқуқий экспертизадан ўтказилмасдан қабул қилиниши, уларнинг Ўзбекистон Республикаси Конституцияси, қонунлари ва бошқа қонун ҳужжатларига, шунингдек қонунчилик техникаси қоидаларига зид равишда қабул қилинишига олиб келиши мумкин.Шунингдек, Мирзачўл туман ҳокимининг 2020 йил 28 майдаги “Туман ҳудудида йўл белгиларини ўрнатиш тўғрисида”ги 376-сон қарори билан Мирзачўл тумани, Ўзбекистон кўчасининг Хўжамқулов кўчаси билан туташган қисмидан туман ИИБ биноси рўпарасигача бўлган йўлга 3.27 “Тўхташ таъқиқланган” таъқиқловчи йўл белгиси ўрнатишга рухсат берилган.
“Норматив-ҳуқуқий ҳужжатлар тўғрисида”ги Қонуннинг
3-моддасига кўра норматив-ҳуқуқий ҳужжат ушбу Қонунга мувофиқ қабул қилинган, умуммажбурий давлат кўрсатмалари сифатида ҳуқуқий нормаларни белгилашга, ўзгартиришга ёки бекор қилишга қаратилган расмий ҳужжат ҳисобланиши белгиланган, бироқ Мирзачўл туман ҳокимлиги томонидан юқорида қайд қилинган норматив-ҳуқуқий хусусиятга эга бўлган 28.05.2020 йилдаги 376-сон қарори ҳам Мирзачўл туман адлия бўлимига ҳуқуқий экспертизадан ўтказиш учун тақдим қилинмасдан қабул қилинишига йўл қуйилган.
Мирзачўл туман адлия бўлими томонидан жорий йилнинг 11 июнь куни мазкур қарорларни бекор қилиниши тўғрисида киритилган тақдимномаси орқали Халқ депутатлари Мирзачўл тумани Кенгашининг “Туман ҳудудидаги аҳоли пунктларининг таркибий қисмларига ном бериш ва уларнинг номларини ўзгартириш тўғрисида”ги қарори ҳамда туман ҳокимининг “Туман ҳудудида йўл белгиларини ўрнатиш тўғрисида”ги қарорлари бекор қилиниб, ушбу қарор лойиҳалари белгиланган тартибда ҳуқуқий экспертизадан ўтказиш учун туман адлия бўлимига тақдим этилиши таъминланди.
Наби ҚОДИРОВ
Мирзачўл туман адлия
бўлими бошлиғи