Янгиликлар

Очиқ ва ошкора мулоқот

Жиззах вилояти Зомин тумани ҳокимлигида вилоят адлия, божхона бошқармалари, вилоят савдо-саноат Палатаси, хусусийлаштириш, монополиядан чиқариш ва рақобатни ривожлантириш давлат қўмитаси Жиззах вилоят ҳудудий бошқармаси билан ҳамкорликда хорижий инвесторлар ва хорижий инвестициялар иштирокидаги корхоналарни ҳамда тадбиркорлик субъектларининг ҳуқуқий ҳимоя қилиш юзасидан “Очиқ эшиклар куни”ни тадбири ўтказилди.

Тадбирга давлат ҳокимият органлари вакиллари, туман ер кадастри, суд ижро департаменти, давлат солиқ инспекцияси, молия бўлими, банклар, хорижий инвестициялар иштирокидаги корхоналар раҳбарлари ҳамда бошқа тадбиркорлик фаолияти билан шуғулланувчи юридик шахслар, якка тартибдаги тадбиркорлар таклиф этилдилар.

Бугунги кунда хорижий инвестициялар иштирокидаги корхоналар ўз фаолиятларини эркин амалга оширишлари учун тўла ҳуқуқий асослар яратилганлиги, шунингдек, уларга қонуний асосларда кўплаб кафолатлар, имтиёзлар преференциялар берилганлиги мисоллар ёрдамида тушунтирилиб ўтилди ва Ўзбекистон Республикаси Президентининг 2012 йилдаги “Статистик, солиқ, молиявий ҳисоботларни, лицензияланадиган фаолият турларини ва рухсат бериш тартиб–таомилларини тубдан қисқартириш чора-тадбирлари тўғрисида”ги ва “Ишбилармонлик муҳитини янада тубдан яхшилаш ва тадбиркорликка янада кенг эркинлик бериш чора-тадбирлари тўғрисида”ги Фармонлари аҳамияти баён этилиб, улар асосида хорижий инвесторларга ва хорижий инвестициялар иштирокидаги корхоналарга берилган имтиёзлар ҳамда яратилган шарт-шароитлар ҳақида сўз юритилди.

Бундан ташқари, жорий йилнинг 18 март куни “Жиззах махсус индустрал зонасини барпо этиш тўғрисида”ги Фармони қабул қилинганлиги, ушбу Фармон билан Жиззах вилоятида Сирдарё вилоятининг Сирдарё туманида филиали бўлган “Жиззах” махсус индустрал зонасини барпо этиш белгиланганлиги ҳамда Фармонинг мазмун-моҳияти иштирокчиларга баён этилди.

Шунингдек, тадбирда иштирок этган хорижий инвестициялар иштирокидаги корхоналар вакилларига ва бошқа тадбиркорлик субъектларига улар ўз фаолиятларида юзага келаётган муаммолар юзасидан вилоят адлия бошқармасига мурожаат қилишлари мумкинлигини тушунтирилди.

Йиғилиш якунида иштирокчилар томонидан берилган саволларга мутахассислар томонидан атрофлича жавоб қайтарилди.